今天我一早起來上學去

在柏林唔會有咁盛大隆重的開學禮。基本上我間學校好casual，隨時都有同學加入或者離開。佢地都可以講得上係來自五湖四海。就好似第一日上堂的同學就分別有來自也門，芬蘭，意大利，羅馬尼亞，韓國等。大部分人來德國學德文都係打算升學。比較少似我咁樣只係來遊學。而年紀亦正因為咁所以都會同大家有一段距離。不過好在西方人普遍都睇唔出亞洲人的年齡。總而之最緊要都係人老心不老啦！

就係咁每日早上九點半至十二點半我又重踏全職學生的生活。特別之處係我的學校基本上距離住所只係一座大廈之隔。完全無呃你，真係一座之隔。由住所門口走到學校門口，都只是二十米內的腳程。真係一生人都未試過咁方便。交通費同時間都可以話係全免。不過針邊有兩頭利呀。住得咁近的唔好處就係生活圈子太小。來來去去都係學校附近幾條街出入。都真係幾悶㗎。所以在開學兩個星期後，我決定令自己可以走得更遠一點：買了架二手單車。

開學式

似乎柏林美食唔俾名古屋差，就算「求其」o既芝士公仔麵都好似好好食．十歐元自助餐，响日本十歐元食自助餐真係唔易．

要講美食都開始要慢慢揾，畢竟去讀書，總唔會似去旅行咁，日日食餐勁．

講到讀書，最緊要係要似學生．特別係久別學生生涯的30開外學生．呢樣日本就好滿足倒我喇．雖則學校只係好係香港o既補習社，但都有一個認真的開學禮，當地學生仲全部都套裝出席．上台致詞的各學科代表亦落足十二分力鼓勵大家相信前路美滿．

我就當然冇帶西裝，只好裇衫西褲了事．
另一樣跟學生生涯有關的是櫻花．當日到步後，在宿舍旁就可看到滿開的櫻花，只是覺得它很美，覺得自己終於身在日本．及後從朋友口中知道它提醒著大家生活的步伐．

食多啲食多啲

真係要再講多次你就好啦。日日唔同菜式，又保證食得飽飽。
喺柏林嘅日子最令我頭痛都莫過於食。要吃得好，又要飽肚，又要有花款，最緊要係經濟實惠，都真係唔容易。
以下都係一啲食嘅回憶：
最喜歡嘅飯後甜品，三蚊港幣一個的朱古力Mousse。

有時懶得去買餸，唯有就地取材，雪櫃有什麼就吃什麼。


有閒情嘅話，就搞得複雜一啲，如自製薯蓉。

後來發現可以用微波爐煮飯，便嚐試炒吓餸撈飯。

食得特別都有嘅，例如去野餐。

係朋友屋企用筷子食瑞士火鍋。

又或者聖誕前夕食烤鴨。

仲有好好味嘅柏林名物咖哩香腸。

呢塊兩歐元嘅薄餅，係放學後最佳醫肚選擇。

星期日嘅十歐元自助餐簡直係柏林嘅美食大寶藏。好多餐廳都會係週末搞這類自助餐招來更多客人。有人話這其實係啲餐廳將一個星期食剩嘅一次過清倉，避免屯積。不過咁平咁抵食，我又唔介意幫吓人哋嘅。

美食巡禮

雖然講唔上香港咁多元化，不過日本美食比起你所描述的德國美食可謂贏一大截．

其實真正日式料理唔多，好多食物都源自外國．就好似咖哩．經改良再改良，成為較甜的日式咖哩．直到2010年仍然係國民至愛的頭三位美食．正因如此，飯堂亦每個月都會有一兩次咖哩食．
至於午飯，起初因為冇雪櫃，若要自携午餐就只有花生醬三文治．仲記得有發育期的同學問：「你咁少就夠?」咁就問下佢地去邊食?原來都唔係咁貴，290円一個便當(當時約24蚊港幣)，比起最平的吉野家平一成多．不過，要避開人潮就要一早去買，記得有同學試過小息去買而遲到．

去到日本，食物選擇唔係問題．比如有無限量甜品選擇

又有西方八面名物(即名產)，如名古屋名物之一的きしめん不過，同你一樣，個個香港同學一開始就鬥慳，慳得一蚊得一蚊．不好不容易揾倒一間100円店，每個月10號會買十送一，我地就約埋同學，點都要賺佢個十送一．畢竟打過工知揾錢辛苦．同班的20歲左右的同學當然唔會同我地癲，要買就同屋企人擺錢．

開飯啦!

點解咁多JA！，原因莫不過是價錢平啦。這個JA！牌在很多連鎖超市都有得賣。有啲似惠康黃金嘜，真係什麼貨品都有。簡直打救了荷包唔少。
至於每次到超市，基本動作都是睇吓有無平嘢執。在香港購物會考慮品質，但人在異鄉時只顧及價錢。
有日行行吓街，竟然碰到一歐元店。由內衣褲至餅乾零食，件件都係一歐元。簡直係開心大發現。

至於每日三餐可以點樣？這便是我最typical的餐單：
早餐：通常係多士或者牛奶加穀物。
午餐：又係多士，不過豪啲會加芝士及蕃茄。再咬多個蘋果。
晚餐：差不多都係意粉。煮好粉後加入蕃茄，紅蘿蔔，腸仔，炸洋蔥粒。調味只加少許鹽，沒有醬汁。不過比想像中好吃。

另外如果出街唔可以係屋企煮的話，通常都帶定乾糧（慳錢呀）。又或者係街邊買啲小食頂肚。
可惜德國人對食的要求真係麻麻。去到邊度都不外乎嗰幾款，例如：
德國大肉腸加個包，大概個幾歐元。

仲有中式炒麵（睇個樣就知有幾好食），都係賣個幾歐元。

相對香港嘅斬大舊叉燒，樣樣都大大碟又肥膩嘅飲食文化，係德國食嘅真係清淡得可以。

週日料理

見你買親都係「ja!」牌，有冇特別原因?

其實當初揀呢間宿舍，除左價錢，就係因為佢有供兩餐．平日响香港除左午餐肉之外就唔係好識煮，要我日日煮，諗起都頭暈．

宿舍膳食唔錯，每個月餐單都會預先公報．偶然仲有應節食品，如櫻花季節時湯會加入櫻花狀粉團，夏天的生菓會有西瓜等．

而早餐有和洋兩式可以揀，洋式(即西式)，就係咁．
不過，你住果度有雪櫃真係好幸福．

我地星期日要自己攪掂．而更重要係，宿舍沒有共用雪櫃！即係話，在沒有買到雪櫃前就別想積存食物．記得有一次，唔想次次出街食咁大洗，整在個微波叮 飯，放D好似魚糧o既ふりかけ(混合了魚肉粉、紫菜、芝麻等材料，如下圖)，但又想食肉，於是加埋「媽媽腸」，味道嘛...始終係自己煮，點都食得落．
又試過去買生菓，一買幾個，起初唔知洗完就要盡快食，結果，放兩日發個柑發霉．攪到果陣一有時間就去睇下有冇雪櫃賣．

歐洲生活

你就好啦！日日有人煮埋飯比你食。我就無咁好彩啦。一日三餐都係靠食自己。
起初以為在歐洲生活會非常昂貴。當然有很多東西都比香港貴好多，如搭車，出街食飯等。不過原來在超市買菜自己煮的話又無想像中咁恐佈。
甚至發現有很多東西都比香港便宜。就好似：
白麵包一大條：約十港元

香腸一大樽：約三十港元

牛奶：約十港元

早餐穀物一公斤：約十港元

另外薯仔紅蘿蔔等西人主要蔬菜更加平過香港兩三成呢！
講返間屋，包租婆是個五十左右的獨身女人，自營一間Event Agency，Home Office的關係，一日二十四小時都係屋企。
對她仍認識不深，只覺得她總有點怪怪的。
例如：雪櫃永遠堆滿食物，有些變壞了仍然不會清理。打開雪櫃時永遠有股怪味。
表面開朗隨和，實質帶點孤僻。一個星期出外的時間不超過三小時。每天只對著電視機過活。
唯一的好處是有時煮湯時會醒一碟給我。